[ 繼 續 ? ]

HAMU開咗一年有多

已經將一年裏面每一個節日都陪伴左大家一次

由一開始只係做小窩到開發節日性產品

上年中秋節嘅反應係出乎我哋意料之外咁好

之後到萬聖節聖誕節新年復活節端午節

萬聖節同復活節幾乎係無人問津

聖誕節新年端午節反應就比較好

我都明冇可能每一個節日都得到大家嘅青睞

第一年甚至一個生意嘅頭幾年都一定係試水溫階段

但係堅持左一年之後嘅今日我深深感受到

我用時間體力換取嘅收入>成本

意思就係每一次市集都係蝕住離場

有時比較可觀就係剛剛回本多少少食個飯

呢一年嚟好多人都會喺網上攻擊我哋

佢都係話我地好和味 賺到肥肥 等等嘅言詞

但實際上事實并非如此

我同HAMU SAN即係男店主住係大西北

入觀塘/九龍做市集自己揸車加埋泊車

(有黎就知我堆野有幾多 2個大篋都唔夠)

已經係叫做比起叫兩程GoGoVan平少少

仲有兩個人嘅食飯錢 而最貴嘅係租金

市集兩日基本價錢為$900左右是眾所周知的

有時市集完結後數數手指咁咁計數機

我和男店主的日薪可能也不超過$100

對啊。。是日薪$100。

是因為以上的成本還未扣貨品本身的成本

撇除準備嘅時間成本

單單係產品製作購買材料嘅本金已經是很高的

因為我們不只售賣手作小食

一年前購買幾匹布 各種新鮮食材

已經膽粗粗擺市集

當時成本不是太大 一個行李箱已經裝好出發

幾個密實盒20多個小窩擺滿枱面

為咗大家可以更清晰市集枱面更美觀

置入咗好多木製展架 收納變得很困難

不再是一個小小行李箱可以放置的了

產品類型添加了許多許多

布藝產品 手工小食仍然都在

但亦多了很多自家品牌設計的產品

我們共有19款鎖匙扣 12款貼紙

小圓鏡 文件夾 等等

每一樣野都務求準備足夠現貨俾大家購買

每一樣存貨都係成本 賣得出與否 都有成本產生

但這一年來我發覺大家是很喜歡新鮮感的

我並沒有責備大家的意思

人嘛 都是喜歡新鮮感的

每次市集都會有客人問我幾時出新產品

我也會尷尬笑一笑 告訴他們冇咁快

我也很想有很多資金出新的產品俾大家購買

所以進入了這個樽頸位的位置

會有人問我咁辛苦點解仲要做？放棄就得啦

有真係同我傾過計嘅客人

應該都知道原意並不是為了賺錢

只係因為我好愛淡奶所以畫佢嘅公仔 整嘢食俾佢

想整小窩俾佢瞓 鍾意幫佢扮靚影相 過節日

初心係如此的簡單 一年後卻變得如此的複雜

但我很享受的是 每次市集可以見到熟悉的面孔

認識新嘅同路人 享受同不同的檔主分享

介紹有心人去領養鼠鼠 做一個中間人嘅角色

我相信亦都係好多手作人享受嘅過程

貴？

客人覺得小店手作小食貴是可以明白的。

但你們有否想像過「成本」一詞呢？

可能最直接的成本 大家都會諗到「食材成本」

例如就覺得粟米12蚊3條 你賣70蚊100g!?!?

但！洗 煮 切 烘 包 等多個步驟 未做過是不能想像的

磨牙曲奇小小一塊 5蚊你們覺得貴

原材料 打粉 溝 搓 壓 印 少許樣衰就砍掉重練 再烘 包

試問大家會唔會行入去寵物店

見到一包廿幾粒機製嘅品牌產品賣$30-40嫌貴？

點解機製冇人嫌貴 全手工做反而俾人嫌貴？

呢個係一個值得反思嘅地方。

唔知我同我嘅品牌仲可以陪伴大家幾耐

不過我都係會繼續以我嘅方式方法同大家見面/溝通

不隨波逐流 不問世事 繼續創作 create!

想再一次告訴大家 我係有全職 並不是全職HAMUHAMU的🤣

最後希望有睇晒成篇千字文嘅你地會認識我地更多更深

HAMU姐姐上